पिंपरी- चिंचवड: पुण्याच्या मावळमध्ये कुंडमळा येथे लोखंडी अरुंद पूल कोसळून चार जणांचा मृत्यू झाला. ५० पेक्षा अधिक जण जखमी असून त्यांच्यावर खासगी रुग्णालयात उपचार सुरू आहेत. या अपघातात कासारवाडी येथील पती पत्नी सुदैवाने बचवले आहेत. योगेश आणि शिल्पा भंडारेलो अशी त्यांची नाव आहेत. दोघे ही कुंडमळा येथे निसर्गाचा आणि निखळ वाहणाऱ्या पाण्याचा आनंद घेण्यासाठी आले होते. यावेळी योगेश यांनी त्यांचा थरारक अनुभव सांगितला आहे. योगेश आणि शिल्पा यांच्यावर अतिदक्षता विभागात उपचार सुरू आहेत. दोघांचा पाय फॅक्चर झाला आहे.
योगेश म्हणाले, देवाच्या कृपेने त्या घटनेतून आम्ही वाचलो. माझी पत्नी आणि मी निसर्गाचा आनंद घेण्यासाठी तिथे गेलो होतो. पूल कोसळला त्याच्या मधोमध आम्ही होतो. त्यामुळे आम्ही आत अडकलो. पुढे- मागे जाता आलं नाही. पूल हालत होता, डगमगत होता. पुढे ते म्हणाले, पूलावर दुचाकी आणल्या जात होत्या. त्यांना आम्ही सांगत होतो. दुचाकी आणू नका. पुढे ते म्हणाले, मंदिरात जाण्यासाठी अनेक त्या लोखंडी पूलाचा आधार घेत होते. मोठी गर्दी झाली होती. घटना घडली तेव्हा डोळे बंद केले होते. डोळ्यासमोर मृत्यू दिसत होता. जगेल याची शास्वती नव्हती. माझी पत्नीला आणि माझ्या पायाला फॅक्चर झालं आहे. स्थानिकांनी आम्हाला मदत केली. जीव वाचवण्यापेक्षा काही जण फोटो काढत होते. वाचवा -वाचवा म्हणत होतो. अनेकांनी बघ्याची भूमिका घेतली. स्थानिक नागरिकांनी आम्हाला वाचवलं आहे. पुलावर जाण्यास बंदी होती. सर्वांनी सुरक्षित पर्यटन करावं. अस आवाहन यावेळी योगेश यांनी पर्यटकांना केलं आहे.
मदतीसाठी याचना करताना योगेश आणि त्यांच्या पत्नीचा व्हिडिओ सोशल मीडियावर व्हायरल होत आहे. योगेश मदतीसाठी याचना करताना दिसत आहेत. सध्या हा व्हिडिओ सोशल मीडियावर व्हायरल होत आहे. यासंबंधीचा थरारक अनुभव त्यांनी लोकसत्ताला ऑनलाइन ला सांगितला आहे.
