रिसोड तालुक्यात कुष्ठरोग व क्षयरोग शोध अभियानास सुरुवात

रिसोड तालुक्यात कुष्ठरोग व क्षयरोग शोध अभियानास सुरुवात
रिसोड – तालुका आरोग्य अधिकारी कार्यालय रिसोड अंतर्गत राष्ट्रीय कुष्ठरोग निर्मूलन कार्यक्रमांतर्गत कुष्ठरोग विषयी जनजागृती करण्याच्या अनुषंगाने कुष्ठरोग शोध अभियान मोहीम राबविण्यात येणार आहे. जिल्हा आरोग्य अधिकारी डॉ. पांडुरंग ठोंबरे, जिल्हा शल्यचिकित्सक डॉ. अनिल कावरखे, सहायक संचालक आरोग्य सेवा कुष्ठरोग वाशिम डॉ. संजय देशपांडे, जिल्हा क्षयरोग अधिकारी डॉ. सतीश परभणकर, तालुका आरोग्य अधिकारी डॉ. रामहरी बेले, वैद्यकीय अधीक्षक ग्रामीण रुग्णालय रिसोड डॉ. प्रशांत पवार यांच्या मार्गदर्शनाखाली ही मोहीम ३१ जानेवारी ते १५ फेब्रुवारी या कालावधीत होत आहे. यादरम्यान घरातील सर्व सदस्यांची तपासणी करिता आरोग्य कर्मचारी व आशा स्वयंसेविका आपल्या घरी येणार आहे. त्यांच्याकडून सर्वांची तपासणी करून घ्यावी व कुष्ठरोग मुक्त महाराष्ट्र करण्यासाठी सहकार्य करावे. कुष्ठरोगाची लक्षणे : कुष्ठरोग हा एक कमी प्रमाणात सांसर्गिक आजार आहे जो मुख्यत्वे त्वचेला मज्जा नर्व्हस सिस्टीम प्रभावित करतो. हा रोग मायकोबॅक्टेरियम लेप्रि नावाच्या बॅक्टेरिया मुळे होतो. कुष्ठरोगामुळे त्वचेवर येणारा कुठलाही चट्टा किंवा डाग हा कुष्ठरोगाचा असू शकतो. त्वचेच्या रंगरूपात होणारे बदल त्वचा तेलकट, लालसर, सुजलेली, कानाच्या पाळ्या जाड होणे, अंगावर गाठी येणे, चेतातंतू  बाधित होणे, डोळ्याची उघडझाप बंद होणे असे लक्षणे आढळल्यास आपण आपल्या जवळच्या शासकीय रुग्णालयामध्ये जाऊन कुष्ठरोगाची तपासणी करून घ्यावी असे आवाहन जिल्हा आरोग्य अधिकारी डॉ. पांडुरंग ठोंबरे यांनी केले आहे.