*स्व. शांताबाई नथमल जाजू यांचे मरणोत्तर नेत्रदान*
वाशिम, दि.१४ डिसेंबर (जिमाका) मालेगाव शहरातील स्व. शांताबाई नथमल जाजू यांचे वयाच्या ९४ व्या वर्षी दि. १३ डिसेंबर रोजी सकाळी ६:४५ वाजता निधन झाले. त्यांच्या मागे बराच मोठा आप्त परिवार आहे. त्या जाजू कुंटुबातील आधारस्तंभ तथा सर्वांना सोबत घेऊन चालणाऱ्या तसेच समाजकार्याची आवड असलेल्या व्यक्तिमत्त्व होत्या. स्व. शांताबाई नथमल जाजू यांचे निधन झाल्याने संपूर्ण जाजू कुटुंबावर दुःखाचा डोंगर उभा राहिला. एवढ्या दुखामध्ये असतानाही जाजू कुंटुंबीयांनी मुत्यनंतर नेत्रदान करुन दोन अंधाच्या जीवनात प्रकाश निर्माण करण्यासाठी नेत्रदान करण्याची इच्छा डॉ. निलेश मानधने याच्यांकडे व्यक्त केली. त्यानुसार जिल्हा सामान्य रुग्णालयाचे जिल्हा शल्य चिकित्सक डॉ. अनिल कावरखे, अति. जिल्हा शल्य चिकित्सक डॉ. अविनाश पुरी, नेत्र शल्यचिकित्सक डॉ. आशिष बेदरकर यांच्या मार्गदर्शनाखाली नेत्र चिकित्सा अधिकारी ज्ञानेश्वर पोटफोडे व नेत्रदान समुपदेशक रमेश ठाकरे यांनी स्व. शांताबाई नथमल जाजू यांची नेत्र बुबुळे काढली व नेत्र बुबुळे त्याच दिवशी वैद्यकिय महाविद्यालय, अकोला येथे पाठविण्यात आली. तरी सदरील नेत्रदान करण्याकरीता निलेश जाजू, हरिष जाजू व जाजू कुंटुबाचे सहकार्य लाभले.
तरी सर्व समाजातील गणमान्य व्यक्तींनी या नेत्रदान चळवळीत सक्रीय सहभाग घेवुन नेत्रदान चळवळ ही लोक चळवळ व्हावी. मृत्यूनंतर जवळच्या व्यक्तीचे त्वरीत नेत्रदान घडवून आणावे व नेत्रदानानंतरच मृतावर अंतिम संस्कार करावे असे अवाहन अंधत्व नियंत्रण कार्यक्रमाचे कार्यकारी समितीचे अध्यक्ष तथा जिल्हा परिषदेचे मुख्य कार्यकारी अधिकारी वैभव वाघमारे व जिल्हा सामान्य रुग्णालयाचे जिल्हा शल्यचिकीत्सक डॉ. अनिल कावरखे यांनी केले असुन जाजू कुटूंबाचे आभार मानले आहेत.
नेत्रदानासाठी संपर्क
९९२२५१९९४८
जिल्हा रुग्णालय वाशिम
