समुदाय आरोग्य अधिकारी यांची समुपदेशनाद्वारे एकवेळची विनंती बदली प्रक्रिया सुरु

जिमाका, वाशीम (दि.२५, जून): आरोग्य मंत्री ना.प्रकाश आबिटकर यांनी दिलेल्या आश्वासनानुसार तसेच निर्गमित शासन निर्णयाप्रमाणे समुदाय आरोग्य अधिकारी (सीएचओ) यांची समुपदेशनाद्वारे एकवेळची विनंती बदली प्रक्रिया सुरु दि.२३ जून पासून सुरु झाली आहे. पहिल्या दिवशी दुर्गम भागात काम करण्यास इच्छुक सीएचओ यांची विनंती बदली प्रक्रिया ऑनलाईन पद्धतीने व्हिडिओ कॉन्फरन्समध्ये पार पडली. दुसऱ्या दिवशी पती-पत्नी एकत्रीकरण अंतर्गत विनंती अर्ज केलेल्या सीएचओ यांची बदली प्रक्रिया पार पडली. आजच्या तिसऱ्या दिवशी सुद्धा अखेरचे वृत्त हाती येईपर्यंत पती-पत्नी एकत्रीकरण अंतर्गत बदली प्रक्रिया पार पाडण्याचे काम सुरु होते. यामध्ये या जिल्ह्यातून पाच जणांची दुसऱ्या जिल्ह्यात बदली झाली आहे; तर इतर जिल्ह्यातून चार सीएचओ बदली होवून या जिल्ह्यात रुजू होणार आहेत. सदर प्रक्रिया ही अतिशय पारदर्शक पद्धतीने सुरु असून यामध्ये सामंजस्यपणाने, सामोपचाराने तसेच सीएचओ यांचे समुपदेशन करून त्यांचे समाधान होईल याची दक्षता घेतली जात आहे. या पारदर्शक बदली प्रक्रियेमुळे सीएचओ केडरमधून समाधान व्यक्त केले जात आहे. ही भरती प्रक्रिया जिल्हा स्तरावर प्रत्येक जिल्ह्यात एकाच वेळी राबविल्या जात आहे.