‘माझ्याकडे ना निधी आहे, ना कॅबिनेट’, कंगना रणौतचे हिमाचल प्रदेशच्या मंडी येथील आपत्ती निवारणाबाबत विधान चर्चेत

“आपत्ती निवारणाचे जे काम आहे, त्यासाठी माझ्याकडे कॅबिनेट तर नाही, मी घटनास्थळी पोहचते पण माझ्या कामाच्या कक्षेत केंद्राकडून निधी घेऊन येणे आहे. माझ्याकडे आपत्ती निवारणासाठी स्वत:चा फंड किंवा कॅबिनेट मंत्रीपद नाही. माझ्याकडे अधिकारीही नाहीत. खासदाराचे एक मर्यादीत काम असते जे संसदेपर्यंतच असते.”आपण घटनास्थळीवर जात असल्याचे सांगताना कंगना रणौत यांनी हिमाचल प्रदेशमधील काँग्रेस सरकारवर गंभीर आरोप केले. ज्यांचे नुकासान झाले किंवा जे जखमी झाले आहेत त्यांना सरकारकडून मदत केली जात नसल्याचा आरोप त्यांनी केला आहे. “आम्ही आमची सांत्वना घेऊन पोहचतो, पण ज्यांचे हे काम आहे ते तोंड दाखवत नाहीत आणि तोंड लपवून बसलेत, पैसे खाऊन बसलेत. केंद्रातून पैसा आला तर माझ्याकडे तरी असा कोणता निधी नाही, ज्यामधून माझ्याकडे पैसा येईल. आला तरी तो राज्य सरकारकडेच येईल. त्यामुळे निधी द्यायचा त्यांनाच आहे. तरीही आमचं काम आम्ही पूर्ण करू,” असे कंगना रणौत यावेळी म्हणाल्या.

तसेच खासदार कंगना रणौत यांनी केंद्राने हिमाचल प्रदेशात सैन्य पाठवून तात्काळ मदत कार्य सुरू केले. तसेच पाच देशांच्या दौऱ्यावर असलेले पंतप्रधान नरेंद्र मोदी यांना परिस्थितीची जाणीव आहे असेही सांगितले. कंगना रनौत या लोकसभा मतदारसंघ मंडी मधून गायब असल्याची टीका काँग्रेसने केली होती, त्यानंतर हा दौरा करण्यात आला.

हिमाचल प्रदेशमध्ये ढगफुटी

मंडी जिल्ह्यात ढगफुटी, पूर आणि भूस्खलनामुळे मोठ्या प्रमाणात नुकसान झाले आहे, यामध्ये चौदा जणांचा मृत्यू झाला आहे आणि ३१ जण बेपत्ता आहेत. बेपत्ता असलेल्याचा शोध घेतला जात आह. या आपत्तीत १५० हून अधिक घरे, १०६ गोठे, ३१ वाहने, १४ पूल आणि अनेक रस्त्यांचे नुकसान झाले आहे.