‘हळद रुसली कुंकू हसलं’: पहिल्याच भेटीत कृष्णा आणि दुष्यंतमध्ये वादाला सुरुवात, पाहा जबरदस्त प्रोमो

दुष्यंत खाली पडल्यानंतर कृष्णा त्याला उठवण्यासाठी हात देते. गावचा रस्ता आणि गाडी व्यवस्थित चालवायची; बुंगाट चालवायची नाही, असं कृष्णा सांगते. तेव्हा दुष्यंतला राग येतो. त्यावर अभिनेता म्हणतो की, तुझ्यामुळे चिखलात पडलो. त्यावर कृष्णा म्हणते, ज्यांची नाळ मातीशी जुडलेली असते, त्यांना चिखलाचं वावगं नसतंय. तुमच्या शहरी लोकांना काय कळणार म्हणा? त्यानंतर दुष्यंत तिला इडियट म्हणताना दिसत आहे. तर, कृष्णा त्याला बुंगाट, असं म्हणताना दिसत आहे. दोघं एकमेकांकडे बोट दाखवून खुन्नस देताना दिसत आहेत, असं या प्रोमोमध्ये दाखवण्यात आलं आहे.

हा प्रोमो शेअर करत असताना स्टार प्रवाहने ‘अशी होणार कृष्णा आणि दुष्यंतची पहिली भेट…’ अशी कॅप्शन दिली आहे. अभिनेत्री समृद्धी केळकर ’फुलाला सुगंध मातीचा’ या गाजलेल्या मालिकेतून प्रेक्षकांच्या मनात घर करून बसलेली आता नव्या भूमिकेतून पुन्हा एकदा ‘स्टार प्रवाह’च्या माध्यमातून प्रेक्षकांच्या भेटीला येणार आहे. समृद्धी केळकर दोन-अडीच वर्षांच्या विश्रांतीनंतर छोट्या पडद्यावर पुनरागमन करत आहे.‘हळद रुसली, कुंकू हसलं’ या नव्या मालिकेद्वारे समृद्धी केळकरचा हा कमबॅक होतो आहे. एका गावरान, ठाम व आत्मविश्वासू तरुणीची भूमिका ती या मालिकेत साकारणार आहे. अभिनेता अभिषेक रहाळकर तिच्याबरोबर प्रमुख भूमिकेत दिसणार आहे. अभिनेत्याने यापूर्वी ‘मन धागा धागा जोडते नवा’ या मालिकेत काम केलं आहे.