मुंबई: बिग बजेट हिंदी सिनेमासाठी हाऊसफुल्ल चालणाऱ्या मराठी सिनेमांचे पॅकअप करणं नेहमीचेच बनलं असून त्याचा फटका मराठी निर्मात्यांना बसत आहे. एकीकडे मराठी सिनेमा चालत नाही अशा चर्चा सुरू असतात आणि एखादा सिनेमा चालला तर हिंदी सिनेमांसाठी मराठी सिनेमांचा आवाज दाबला जातो. असे प्रकार अनेकदा घडले आहेत.
बिग बजेट पॅन इंडिया सिनेमा ‘पुष्पा २ : द रूल’ लवकरच प्रदर्शित होत आहे. या सिनेमाचं अॅडव्हान्स बुकिंगही जोरदार झाल्याचं समोर आलंय. सिनेमानं १०८५ कोटींचं कलेक्शन केल्याचं म्हटलं जात आहे. पण या सिनेमासाठी आता महाराष्ट्रात मराठी सिनेमांचे शो कॅन्सल किंवा कमी करण्यात आल्याचं म्हटलं जात आहे. गेल्या काही वर्षात मराठी सिनेमांना प्रेक्षकांचा मोठा प्रतिसाद मिळताना दिसतोय. मात्र, हिंदी सिनेमांच्या तुलनेत स्क्रिन्स मिळण्यासाठी मराठी सिनेमांना आजही मोठी स्पर्धा करावी लागत असल्याचं चित्र आहे.
सिनेमाचे शो केले कमी
धर्मरक्षक महावीर छत्रपती संभाजी महाराज हा सिनेमा २२ नोव्हेंबर रोजी प्रदर्शित झाला होता. या सिनेमाला पहिल्या आठवड्यापेक्षा दुसऱ्या आठवड्यात प्रेक्षकांचा प्रतिसाद चांगला मिळाल्याचं दिसत होतं. पण आता पुष्पा २ मुळे धर्मरक्षक महावीर छत्रपती संभाजी महाराज चित्रपटाचे शो कमी करण्यात आले आहेत,तर अनेक ठिकाणी मराठी सिनेमांचे शो रद्द करण्यात आल्याचंही म्हटलं जात आहे.
छत्रपती उदयनराजे भोसले यांनी पाहिला सिनेमापु
दरम्यान, अभिनेत्री अमृता खानविलवर आणि अभिनेता ठाकूर अनुप सिंग यांच्या मुख्य भूमिका असलेल्या धर्मरक्षक महावीर छत्रपती संभाजी महाराज या सिनेमाची चर्चा सुरू आहे. संदीप रघुनाथ मोहिते-पाटील प्रस्तुत आणि उर्विता प्रोडक्शन निर्मित हा सिनेमा छत्रपती उदयनराजे भोसले आणि त्यांच्या कुटुंबियांनी पाहिला आहे. निर्माते संदीप रघुनाथ मोहिते-पाटील यांनी छत्रपती उदयनराजे भोसले आणि आमदार शिवेंद्रसिंह राजे भोसले यांची खास भेट घेत सिनेमाचा ट्रेलर सर्वप्रथम त्यांना दाखवण्यात आला होता. दोघांकडूनही सिनेमाच्या ट्रेलरचे कौतुक झालं होतं.
