अलिबाग – अलिबाग वडखळ राष्ट्रीय महामार्गाच्या डांबरीकरणसाठी २२ कोटी १४ लाख रुपयांचा निधी मंजूर करण्यात आला आहे. त्याच बरोबर महामार्गाच्या चौपदरीकरणासाठी हालचाली पुन्हा सुरु झाल्या आहेत. त्यामुळे अलिबागला येणाऱ्या पर्यटकांची तसेच स्थानिकांची नेहमीच्या वाहतूक कोंडीतून सुटका होणार आहे.
विधीमंडळात विधानसभा अध्यक्ष राहूल नार्वेकर यांच्या दालनात यासंदर्भातील बैठक पार पडली. या बैठकीला राज्याचे सार्वजनिक बांधकामंत्री शिवेंद्रराजे भोसले, आमदार महेंद्र दळवी, आमदार महेश बालदी, माजी आमदार सुभाष पाटील, आस्वाद पाटील उपस्थित होते. अलिबाग वडखळ राष्ट्रीय महामार्ग हा सुरवातीला राष्ट्रीय महामार्ग प्राधिकरणाकडे होता. आता हा महामार्ग राष्ट्रीय महामार्ग बांधकाम विभागाकडे हस्तांतरीत करण्यात आला आहे. मात्र हस्तांतरणाची तांत्रिक प्रक्रीया पूर्ण झाली नसल्याचे कारण देत दोन्ही यंत्रणांकडून रस्त्याच्या देखभाल दुरुस्तीकडे दुर्लक्ष केले जात होते.
महामार्गावर ठिकठिकाणी खड्डे पडल्याने, वाहन चालकांना मनस्ताप सहन करावा लागत होता. त्यामुळे रस्त्याची तातडीने दुरुस्ती करा आणि चौपदरीकरणासाठी फेरप्रस्ताव सादर करा असे निर्देश यावेळी सार्वजनिक बांधकाम मंत्री शिवेंद्रराजे भोसले यांनी राष्ट्रीय महामार्ग बांधकाम विभागाला दिले.
